Alex Schwengle:Aruba bon representa den Juegos Sur Americanos de los juveniles 2017

Minister Demisionario, dr. Carlos “Alex” Schwengle hunto cu famia di e atletanan cu a representa Aruba na Santiago, Chile a duna nan bon bini despues di a haci un bon trabou den e di dos Juegos Sur Americanos de los juveniles 2017. E competencia aki tabata un preparacion p’e olimpiada hubenil cu lo tuma luga na October 2018 y ta spera cu nan por clasifica pa asina participa den e olimpiada. 

Aruba ta orguyoso di nan participacion pasobra mas di 50 atleta tabata selecta a base di e reglanan vigente di Comite Olimpico Arubano (COA). Den e cantidad di atletanan a scoge e 11 atletanan cu a representa Aruba na Chile. Por ta orguyoso cu e atletanan a bin cu 3 medaya pa Aruba cu ta 1 medaya di brons den landamento femenino, 1 medaya di plata den judo y 1 medaya di oro den taekwondo.

 

E atletanan no a yega logra bay cu e medayanan aki, pero nan mester a competi na un nivel halto pa logra esaki. Esaki ta un muestra cu Aruba pa ta un isla chikito, tin bon atleta y potencial. “Dios duna cu e muchanan aki y e otronan tambe pa saca mas inspiracion y ambicion pa traha duro”, asina Minister Demisionario Schwengle a expresa. Esaki ta un dedicacion di tur dia pa por yega na e nivel aki. Nan mester mantene esaki y te hasta por supera e nivel pa nan por yega e Weganan Olimpico na 2020 y kisas 2024, cual meta ta pa yega eynan.

 

Minister Demisionario Schwengle a felicita e atletanan, coachnan, COA y tur instancia di deporte cu a yuda na forma e hubentud. No por a keda sin gradici e mayor, amistad y fanaticonan rond di e atletanan, kendenan a sostene y pusha nan pa yega asina leu.

Tambe a gradici e atletanan cu no a logra bin cu medaya pa nan participacion, pero cu e experiencia aki yuda nan sigui crece y pa futuro nan tambe logra medayanan den competencia asina aki pa pais Aruba.

 

Ta spera cu hubentud en general siña di e grupo chikito aki, pasobra no pa motibo cu Aruba ta chikito nos no ta inutil y no por. Pero al contrario, Aruba ta un isla chikito orguyoso, cu hopi capacidad. Minister Demisionario Schwengle ta kere cu sigui cu e reorganisacion den deporte hiba den e ultimo añanan, por logra hopi mas pa pais Aruba.

Comments

comments

Source link

Directora Maria Pita di Departamento di Asuntonan Economico: Expro Desk t’ey pa yuda companianan chikito y mediano

Recientemente Departamento di Asuntonan Economico a crea un seccion cu ta un herment importante pa empresarionan cu kier cuminsa cu exportacion riba tereno di creatividad. Esaki a wordo anuncia den presencia di Minister di Asuntonan Economico Richard Arends.

Sra. Maria Pita, directora di Deptamento di Asuntonan Economico, a splica cu e “helpdesk” ta un resultado di e evento unda cu mentenan creativo di Aruba a bini hunto. `E lo yuda facilita tur esnan cu kier exporta nan creacion, por ta musiconan cu kier exporta nan produccion of artistanan cu tin un producto of servicio cu nan kier exporta”, sra. Pita a bisa. E servicio aki ta hopi amplio mes. E desk por yuda e personanan cu informacion, guia y acceso na mercadonan pafo.

Señora Pita a enfatisa cu no ta importa si ta trata di productornan chikito, pasobra e oportunidadnan tey. Pesey a pone dos persona na e helpdesk aki, Sharon Meijer y Susan Sint Jago, kendenan a haya training pa por atende cu e ramo specifico aki di exportacion. “Pues nan ta cla pa yuda tur cu ta cla pa dal e stap pa cuminsa exporta nan producto of servicio. No ta nada si abo ta kere cu ainda bo no ta cla ya cu nos ta yuda bo yega na e punto ey. E ta principalmente pa companianan chikito y mediano cu Depto. Di Asuntonan Economico ta traha cu nan y nos ta hopi positivo cu nos por duna nan un ayudop’asina nan tin un mercado hopi mas amplio pa nan producto y servicionan.”

Tabata inicio di e siman aki cu Departamento di Asuntonan Economico, Comercio y Industria a anuncia cu Exprodesk tahabri su portanan oficialmente pa duna consulta, training y workshop na tur compania y empresario cu tin interes pa exporta nan producto y servicio. Meta principal di e export promotion desk ta pa crea mas actividad economico pa medio di exportacion di producto y servicionan local.

Comments

comments

Source link

ATIA y Camara di comercio di Pereira ta firma un acuerdo comercial

ATIA siman pasa, pa medio di su presidente, Ronald van Trigt, a firma un acuerdo cu Camara
di Commercio di Pereira. Di parti di Camara di Comercio di Pereira a firma nan director doctor Mauricio Vegas Lumus. Un cantidad di invitadonan special y prensa tawata presente na e acto aki.

Aruba a wordu alavez dignamente presenta durante e acto aki, cu a goza di un cantidad di
miembronan di prensa di Pereira, pa medio di Miss Universe Aruba, señorita Alina Mansur,
cu a presenta Aruba dignamente durante e evento aki, dunando tambe un presentacion di
nos Isla y su naturaleza. Sr. Ronald van Trigt a splica con importante e tipo di acuerdonan aki ta, especialmente cu un Camara activo manera esun di Pereira, cu recientemente a wordo nomina como un di e Camaranan mas excelente pa nan iniciativa “El Primer Ladrillo”, un programa na unda comercio y comunidad a bin hunto pa construi un Centro di Convencion, cu a wordo inaugura na februari ultimo door di Presidente di Colombia, Sr. Juan Manuel Santos, y na unda Minister president di Aruba sr. Mike Eman y un gran cantidad di hoben, cu pa medio di ATIA su miembronan a wordo invita pa participa, pa asina concientiza nan mes di e importancia di proteccion di nos medio ambiente. Risaralda ta e Departamento di Colombia cu un actividad economico creciente, muy en particular turismo ecologico, y na unda inversionnan importante ta tumando luga. Pa ATIA e meta di e acuerdo aki ta pa duna comercio di Aruba aceso na un region importante di Colombia, cu ta keda hopi cerca di Medellin y Bogota y ta un excelente region pa comercio, educacion di proteccion di medio ambiente, salud y turismo.

Pa Aruba e acuerdo ta brinda oportunidad nobo di educacion den turismo , intercambio di
programanan universitario, expande nos oferta turistico den region, cooperacion ariba e
tema di conservacion di naturaleza, y un cantidad mas di posibilidadnan comercial.
ATIA ta sigui hasi un esfuerzo maximo pa tin contacto den nos region y pa miembronan di
ATIA y Comercio di Aruba en general, hasi uso di oportunidadnan di hasi negoshi cu region.
E contactonan cu ATIA ta crea por ta di gran valor pa esnan cu ta interesa den e region
Colombiano aki.
ATIA no por keda sin gradici Colombian Adventure pa nan cooperacion I coordinacion pa
hasi e contacto importante aki, cu a conduci na un acuerdo di cooperacion importante.
Den e dianan nos dilanti ATIA lo bai coordina un peticion di Gobernador di Risaralda pa bow
di su guia bin cu un delegacion comercial, educativo y di medio ambiente Aruba, pa asina
duna balor na e acuerdo aki, na un nivel gubernamental.
ATIA semper ta keda traha pa mehoracion di e clima di Comercio di Aruba, y un di e
metodonan ta pa crea oportunidad di negoshi den nos region.

Comments

comments

Source link

Kiwanis Club Of Aruba a instala miembronan y entrega reconocimiento special

Durante e luna di augustus Kiwanis Club of Aruba a instala cuater miembro, cu a ricibi un caluroso bonbini, cerca e miembronan di e club. E prome dos miembronan cu a instala durante un cena na White Modern Cuisine tabata; Nathalie Maduro y Ingmar Ramharakh.

Nathalie ta e actual Directora di Departamento di Agricultura, Cria y Pesca pa Gobierno di Aruba, conoci como Santa Rosa. Sinembargo su carera mes a inicia na Direccion di Turismo, unda el a fungi den diferente posicion, tanto na Aruba como na Merca. Su meta ta pa contribui cu su esfuerzo y experticio, mediante e proyectonan innovativo, funda pa Kiwanis Club of Aruba, pa conscientisa y stimula nos muchanan. Ingmar ta eherce e funcion di Kwaliteitsfunctionaris na LABHOD (FSLMA) situa na Dr. Horacio Oduber. E laboratorio ta consisti di 3 departamento y Ingmar su tarea ta, pa guia tur tres den implementacion di e sistema di calidad, pa asina e departamentonan menciona ta acredita. Un miembro di Kiwanis Club of Aruba, cu ta su amigo di infancia, a acerc’e pa forma parti di e famia di Kiwanis. El a keda impresiona cu e proyectonan cu enfoke riba e muchanan y ademas e ta kere den duna bek na comunidad, unabes formando parti di Kiwanis. Como e sponsor di Nathalie tabata Indra Anthony-Pereira conhuntamente cu Aurora Dijkhoff, cu ta e presidente actual di Kiwanis Club of Aruba. Pa e instalacion di Ingmar tabata su amigo di infancia, Giantonio Muller conhuntamente cu Indra Anthony-Pereira.

E ceremonia di instalacion tabata dirigi pa Bob Spellen,Vice Governor Designate di Eastern Canada and the Caribbean District di Kiwanis International. Durante e anochi aki tabatin un reconocimento special entrega na Ethan Muller, cu a haci un trabou impresionante como Lieutenant Governor di Division 4 di Caribbean
Atlantic District di Key Club International. Ethan a bira e ganador di e prestigioso Robert F Lucas Award, cu el a ricibi na International Convention di Key Club na San Antonio,
Texas. E siguiente dos miembronan cu a keda instala durante un reunion di e club tabata;
Marise Nicolaas-Maduro y Jesseline Berg. Ambos tabata forma parti caba di e famia di Kiwanis Club of Aruba. Jesseline tabata miembro activo durante 6 aña di Key Club Colegio Arubano, unda el a fungi como director social y tambe Lieutenant Governor. Marise durante e tempo cu e tabata miembro di e club, el a traha den diferente proyecto, pero debi na su estudio y trabou, a yega un momento cu e mester a retira. Awor cu e ta cla cu e etapa aki, el a join bek e famia di Kiwanis. Marise despues di a traha 15 aña cu SKOA, lo sigui su carera den enseñansa na IPA desde 1 di november proximo. Como e sponsornan di tanto Jesseline Berg y Marise Nicolaas-Maduro tabata Aurora Dijkhoff y Bob Spellen y nan a ricibi e boton di Kiwanis for di Giantonio Muller, kende desde 1 di october 2017 ta e Lieutenant Governor di Division 26 di Eastern Canada and the Caribbean District di Kiwanis International. Kiwanis Club of Aruba ta un club cu su miembronan ta hopi dedica y activo, trahando primordialmente na bienestar di nos muchanan y otro proyecto na beneficio di nos comunidad.

Comments

comments

Source link

Minister Michelle Hooyboer-Winklaar: Cantidad record di studiante a drenta Enseñansa Superior

Comienso di luna di augustus ta e periodo cu nos studiantenan ta cuminsa prepara pa inicia nan estudio na nivel di Enseñansa superior na un scol local of, manera ta custumber, grupo di studiantenan ta biaha pa exterior.

Segun informacion oficial di Directie Onderwijs cu ta maneha aplicacionnan di prestamo di estudio, aña 2017 a mira un aumento significante di cantidad di studiante cu lo drenta un programa na nivel di MBO, HBO of WO. Ta trata di un cantidad di 699 studiante cu a scoge pa un programa di estudio na Hulanda, Merca, Canada, Corsou of localmente na Universidad di Aruba, Colegio EPI of Instituto Pedagogico Arubano (IPA). E cantidad aki ta representa un aumento di 20% riba e 584 studiantenan cu a drenta un programa na aña 2016 y un aumento di 50% compara cu e 471 studiante cu a drenta na aña 2015. “Pa mi esaki ta un confirmacion di e interes creciente pa sigui studia na nivel di Enseñansa Superior, algo
cu nos a pone como un meta principal den Enseñansa”, asina Minister Michelle Hooyboer-Winklaar a splica. “E trend aki ta significante pa e motibo cu mas studiante cu ta scoge pa sigui nan estudio local of internacional lo tin un efecto positivo pa nos pais mirando cu actualmente 13% di nos poblacion tin un diploma na nivel di HBO/WO. Un diploma di HBO of WO ta esencial pa e desaroyo pa cada ciudadano y pa nos pais en general.

Tin hende cu ta tuma mas tempo pa por yega eynan y no ta logra sigui un liña recto for di enseñansa primario, secundario pa Enseñansa Superior, pero ta importante pa crea oportunidadnan pa tur esunnan, a pesar di nan trayectorio, pa por sigui un pathway”, Minister Hooyboer-Winklaar a bisa. Entre e paisnan di estudio cu a conoce un crecemento remarcabel ta Merca y Canada cu 121 studiante cu destino pa un College of University na Merca of Canada, representando un triplificacion di e cantidad di studiante bayendo eynan. “Mi ta sumamente contento pa mira e diversificacion tumando luga entre e paisnan cu nos studiante ta scogiendo. Aunke Hulanda ta keda un escogencia pa hopi studiante, nos ta mira cu e esfuerso cu a wordo haci pa crea mas oportunidadnan pa nos studiantenan na otro paisnan ta logrando”, asina Minister Michelle Hooyboer-Winklaar a finalisa bisando.

Comments

comments

Source link

Dia 13 y 14 di October, Movimiento ta Bida lo bay tin su congreso internacional

Nos a combersa cu sr. Rudy Leysner, kende ta presidente di fundacion Movimiento ta Bida y a splica di un congreso cu ta bay tin, con esaki a nace, dicon Aruba, kendenan lo tey, kico ta e intencion su tras, su historia.

Leysner a comenta cu e idea a cuminsa dos aña atras, unda cu el a bay diferente congreso y e ora a haya diferente informacion y loke cu e kier a comparti y locual el a cuminsa traha riba dje ta networking, pa por organisa den Caribe, e prome Caribbean Active Aging Congress. Eynan e idea a cuminsa. Aña pasa a cuminsa sondea si por haya e instancianan tambe cu ta carga e idea aki. A acerca minister Alex Schwengle y mesora e tabata esun cu a duna tur su sosten na e fundacion, pa asina aki cuminsa cu e idea y pa trece dilanti pa realmente concretisa e congreso aki na Aruba. Despues a acerca diferente orador. Tin 7 orador internacional. 4 ta considera nan como Top of the Line, uno di Chile, Sandra Matsudo, for di San Francisco, dr. prof. Eric Pepper y for di Servace Mess for di Canada y for di Brasil, tin Paolo Farnetti. Ta considera Corsou y tambe Puerto Rico como realmente local den Caribe. Ta bay tin dos dokter for di Corsou, dr. Schakkel y dr. Silvanie y for di Puerto Rico tin Jose Acarron. Di parti di Aruba tin cuater orador. Tin e presidente di e plataforma di cuido di anciano, kende ta dr. Sandro Waterloo y tambe tin di parti di Club Kibrahacha 60+, Jeffrey Matos y tambe tin di SABA, dr. Mienke Gonzalez y Rudy Leysner mes lo tey como un orador den e congreso internacional cu lo bay tin dia 13 y 14 di October.

 

Kico por spera

Leysner a splica cu e resultado lo ta cu lo bay haya hopi conocemento. Esnan cu lo asisti lo haya hopi conocemento pa loke ta wordo haci pa hendenan grandi, vooral riba actividad fisico y tambe otro actividadnan tambe. A acerca diferente organisacion na Aruba pa asisti. Tin mas of menos un 250 caba cu di parti di scol tin 100 participante y di tur esnan cu ta traha cu hende grandi, e gruponan social di 60+ tin rond di 250 persona cu lo participa.

E otro 250 luga tin un prijs hopi special pa tur esnan cu kier acudi y haya mas conocemento tocante embehecemento activo.

 

Interes na Aruba

Leysner a splica cu a ripara cu na cuminsamento no tabata facil pa cuminsa convence hende pa actividad fisico, vooral hendenan grandi. Pero poco poco den e tanto añanan cu ta trahando, por a mira cu nan ta mira e beneficionan cu haciendo actividad fisico diariamente, nan ta mira realmente beneficionan. Awo, e luganan, unda cu e fundacion ta duna actividad fisico ta yen, cu no tin luga pa acepta otro participantenan.

 

Activo

Fundacion Movimento ta Bida ta activo dos biaha pa siman den diferenet bario. Nan ta na Centro di Bario Noord, nan ta na Centro di Bario Tanki Leendert, nan ta na Centro Pastoral Dakota y nan ta na club Estrella.

Comments

comments

Source link