Gobièrnu di Kòrsou/SOAW ta inougurá e proyekto “Biña mas Bieu mas Bon”

E proyekto aki ta wòrdu supsidiá dor di gobièrnu di Kòrsou i ta wòrdu ehekutá pa St. Thuiszorg Banda’Bou i St. Wit Gele Kruis. Un(1) bia pa siman 25 grandi di barionan di Tera Korá, Westpunt, Montaña i Gibraltar ta akudí na nan sentro di bario kaminda nan ta wòrdu konsientisá i guiá pa mehorá nan salú i bienestar general.

Wendys
WEB
Banco di Caribe
wendys banner

E enkuentronan aki lo ta hopi interaktivo, kaminda e grandinan ta topa otro den un ambiente sosial, nan ta hasi obra di man, haña informashon kon pa hasi moveshon i kome salú, bishitá sitionan históriko di Kòrsou etc. E intenshon ta pa e grandi sali for di su situashon di isolashon i biba mas salú i independiente mas largu posibel den su propio ambiente, konforme maneho di gobièrnu.

Comments

comments

Source link

Kòrsou Transparente ta lansa kompetensia di Video Clip

E tambu 'Man Limpi' di Evita Ross i Wietze Krikke ta un gran éksito. E duo
musikál a skibi un kantika en espesial pa e siman di konsientisashon riba korupshon algun tempu pasá. Riba retnan sosial e kantika a wòrdu distribuí mas ku 450 biaha i mirá mas ku 63 mil biaha. Fundashon Kòrsou Transparente ta sumamente kontentu ku e reakshonan positivo. “Nos a risibí hopi komplimènt pa nos kampaña ku a wòrdu lansá ku Corruption Watch, Sur Afrika.” E kampaña tabata posibel ku yudansa di hopi boluntario. Awor e reto ta pa kontinuá e proyekto ku e tiki rekurso ku tin” asina presidente Camillo Bakhuis ta bisa.
Pa sigui ku e kampaña di konsientisashon kontra korupshon Kòrsou Transparente ta lansa un kompetensia di video clip. E fundashon ta reta pueblo di Kòrsou pa traha un video musikal riba e tambú 'Man Limpi'. "Partisipá ku bo departamentu, bo fundashon, klub di deporte, skol di baile, grupo di skol òf klas, nos ta reta tur hende” Bakhuis ta sigui bisa. Partisipantenan tin 4 siman di tempu pa entrega nan video. Un tim di hurado spesialisá den e ramo aki lo evaluá e videonan. Na tur nan lo asigna 4 premio: ‘Best Videoclip’, ‘Most Original’, ‘Best Choreography’, ‘Best Visualizing the Corruption Awareness Theme’. E ganadornan lo gana un suma di NAf. 2000,- kual lo wòrdu dediká na un proyekto sosial òf instituto di karidat di eskoho di e tim ganador. E video clip aki lo bira e video clip ofisial di e Tambu ‘Man Limpi’. Públiko tambe por vota via di medionan sosial pa nan clip faborito pa asina saka un ganador pa e asina yamá ‘Publics' Choice Award’. "E kantika mester di un video kreativo. E kantika ta kontagioso i e letranan ta duna hopi espasio pa inspirashon. E produktornan di e kantika a habri kaminda pa e tema di korupshon. Mientras tantu ya por a tuma nota di algun goreografianan. Awor nos ta reta nos komunidat pa duna kontenido visual na e kantika." E kantika i reglanan pa partisipá na e kompetensia ta disponibel riba nos página di Facebook KorsouTransparente. Ganadonan lo wòrdu anunsiá riba dia 30 novèmber na okashon di Punda Vibes riba Gomezplein.

Comments

comments

Source link

FRAKSHON DI MAN DI BISHIITA SERKA BESTUUR DI ACU RELASHONA KU DIA DI CREDIT UNION

Relashoná ku dia di Credit Union 19 òktober 2017 frakshon di MAN a hasi un bishita serka bestür di ACU. E aña aki ACU ta kumpli 55 aña di eksistensia i ta un di e koperativanan di mas grandi aki na Kòrsou. Durante di e bishita aki miembronan di frakshon di MAN a interkambiá riba diferente tópiko relashoná ku koperativismo. Durante e interkambio a bini hopi punto balioso dilanti i ku sigur ta di atenshon pa traha riba den futuro komo fakshon. Tambe nos a haña un bista di e importansia di koperativa pa un persona por logra yega na su kas, outo òf bai di vakashon. Frakshon di MAN ta felisitá demas koperativa riba dia di Credit Union i pa sigui duna un aporte positivo na nos pais.

Comments

comments

Source link

DIA #2 DI BOSO REPRESENTANTE SRA GISELLE MC WILLIAM NA NASHONNAN UNÍ NA NEW YORK.

Ayera 17 òktober 2017 tabata un dia yena ku relato di diferente tema nan interesante ku Nashonnan Uní ta atendé. E promé tabata tokante e “Global Compact” riba imigrashon. Un tema ku pa hopi aña no tabata riba agènda di Nashonnan Uní, pero na 2016 riba petishon di paisnan di Union Europeo a subi esaki bek riba agènda.

Pa asina logra traha un malchi kon
pa atendé ku e fluho Grandi di imigrante pa Europa for di diferente pais Afrikano, ku un di resultado nan e responsabilidat kompartí di paisnan den Union Europeo pa ku e problemátika aki. E dokumento final ainda no a finalisá pero e mester ta unu fleksibel, e hende mester ta sentral unda leinan humanitario mester ta e kompas. Aki nos tabata tin e oportunidat di focus riba e problemátika aki pa islanan ku totalmente diferente di paisnan grandi i mustra  e  importansia pa inkluí esaki tambe den e dokumento final. Nos segundo relato tabata riba e tema di e 17 SDG’s (Sosial Develpment Goals)ku a wòrdu aseptá pa 44 pais  ku a komprometé nan mes pa implementá nan. Di parti di Reino Hulandes a traha rapòrt kon kada un di e paisnan den Reino ta bai traha riba e SDG’s segun nan nesesidatnan. Importante tabata pa menshoná ku Kòrsou a hinka e diferente SDG’s nan aki den e programa di gobernashon ,ku ta algu úniko. Kòrsou tabata dignamente representá  dor sra. Nelaam Melwani ku ta traha na Embada di Reino na New York. Unda ku hopi dedikashon i atmirashon di su koleganan ta sòru pa inkluí Kòrsou ,St.Maarten i Aruba. E di tres relato tabata  representante nan di NU riba e tema di riba derechonan di personanan desabilitá i unda nan ta boga pa di parti di Reino Hulandes inkluí mas hende muhé desabilitá den e komishon ku ta representá Reino. E di kuater relato tabata serka direktor di Afrika UNDP, sr. Mar Dieye enkargá pa kombatí ekstremista “Violento”.

Esaki ta posibel despues ku a traha un rapòrt
úniko, ku ayudo di Reino Hulandes i Swisa, unda e ta duna un bista real unda ta e rais di e kresementu di ekstremista “Violento” na Afrika. E meta ta por medio di edukashon i énfasis riba “critical thinking” pa logra esaki I alabes hasi e buraku entre gobièrnunan i pueblo nan mas chikí. Tambe a toka e tema di e importansia di e “compliance” di pagamentu di Belasting
na e paisnan Afrikano ku lo yuda e invershonnan importante pa ku desaroyo di e kontinente aki. Despues di esaki e delegashon di Reino tabata di bishita na embahada /mishon di Italia, unda nos a wòrdu risibí ku bon kòfi ekspreso dor di e Embahador Sebastian Cardi. Aki a duna un bista kon e bon e koperashon entre Reino i Italia a logra e asina yama “split term” di e asiento den “Veiligheidsraad” na NU,unda Italia a sinta 1 aña i Reino lo sinta e un aña (entrante Maart 2017),ya ku normalmente esaki ta 2 aña pa keda término. Pa Italia e tema di Libya tabata importante pa a buta riba agènda, pero tambe ku hopi orguyo ku nan a boga pa perseverá e herensianan kultural /histériko den paisnan den konflikto.

Na final di dia Embahador di Reino Karel Oosterom a duna un amplio splikashon ku e votashon a bai pa e asiento den “Veiligheidsraad”.Kon a lobby Hopi aña i e bentahanan ku Reino ta tin.Pero no opstante esaki tog e “race” entre nan ku Italia tabata muchu close i mirando ku den mesun un siman di esaki e resultado di Brexit a keda anunsiá, tabata un mandato pa mustra Mundu ku Europa ta mas fuerte trahando huntu i asina kompartí “ split term” di Veiligheidsraad di UN. Un dia yena ku informashon i kontribushon Positivo.

Comments

comments

Source link

Day #1 Boso Representante na Nashon nan Uní

Ayera durante nos promé dia di bishita na Nashon nan Uní nos a sera konosí e ku edifisio di e
organisashon aki i su historia. Pero tambe haña un bista di e diferente órganonan di NU i kon nan ta funshoná.

Aki nos por presensia e votashon di e 193 paisnan den Asamblea General pa e asina yama “Humanitarian Council”, unda lòbimentu ta tuma lugá di e paisnan ku ta interesá pa drenta e komishon aki. Impreshonante tabata pa mira kon Mundu ta presente den un solo sitio ku ta NU. Despues nos a bishita e embahada/mishon di Reino Hulandes i haña un splikashon kiko ta e puntonan di enfoke di nan trabou riba diferente tereno ku tin di haber ku geopolitiko riba e nivel di Nashonnan Uni.Aki nos a haña un tremendo briefing di General Patrick Cammaert ku tabata na kabes na diferente mishonnan di pas rònt Mundu. E la duna nos un bista úniko kon e mishon nan militar  aki ta kana bou di mandato di NU,ku e meta pa logra pas. Loke a resaltá ta e “approach” ta kambia pa logra esaki.

Por ehèmpel awor NU ta entrená e militar  muhé pa nan ta esunnan ku ta bai aserka e hende muhénan den e diferente paisnan di konflikto, mas tantu ku ta posibel, enbes di hende hòmber.Pero tambe e importansia di teknologia awendia. Mas lat nos a haña un update di e mishon na Mali (Africa) di e mishon Minusa unda Hulanda ta aktivamente envolví i unda resientemente Minister di Reino di Defensa sra.Hennes a entrega su retiro,pa motibu ku 2 militar Hulandes a pèrdè nan bida durante entrenamentu. Anochi nos a tabata tin un resepshon na kas di Embahador di Reino Karel van Oosterom ,unda e la enfatisá e importante ku Reino Hulandes pa promé biaha ta realmente representá na den e delegashon di Parlamento.

Comments

comments

Source link

Parlamentario Wimbert Hato ta urgi pa introdusi oloshi digital den sala di Parlamento

Basa riba mi eksperensia den parlamento di korsou den kual hopi biaha tin konfushon pa loke ta trata minütnan ku parlamentarionan tin pa papia. Parlamentario Wimbert Hato di frakshon di partido MAN pa medio di un karta a sugirí presidente di parlamento pa introdusí un oloshi digital den sala di parlamento. Esaki ta pa un i tur den sala por nota e ora korekto ora duna turno na un parlamentario.Den pasado tabatin hopi diskushon i konfushon rondó di kantidat di minit ku sobra i ku E oloshi digital aki lo mustra kuantu tempu mas falta i esei lo trese transparensia i lo informá e parlamentario miéntras ku e ta na palabra kontinuamente di e kantidat di tempu ku e la sobra.
Pues e oloshi mester por mustra e ora i simultaniamente tambe e tempu ku a sobra e parlamentario na palabra. Sr Hato ta spera ku presidente di parlamento lo duna oido na e petishon aki pa un mihó funshonamentu di parlamento.

Comments

comments

Source link

Promé ehemplar di biografia Enith Brigitha pa Minister Alcalá-Wallé

Djamars mainta Enith Brigitha a ofresé e promé ehemplar na Kòrsou di e biografia Enith  Brigitha. Zwemmen in de schaduw van doping na Marilyn Alcalá-Wallé, Minister di Deporte. Tambe presente na e okashon tabata representántenan di e organisashon di Olimpiádonan di ántes, Jan Boutmy. E buki tokante e karera deportivo di Enith ta na benta awor na  bukhandelnan lokal, kaminda Yu di Kòrsou por topa Enith i, si ta desea, lagé firma nan buki.
E promé Meet&Greet ta djamars mèrdia 17 di òktober foi 16’or na Mensing's Caminada. Despwes riba djarason ta sigui bukhandel Samsom na Fokkerweg, tambe foi 16’or. Djasabra por enkontrá Enith foi 11’or na bukhandel Bruna den Zuikertuintje Mall.
E buki ku ta rikamente ilustrá tin 196 página i ta kosta 40 Naf. Por wak tambe e pelíkula kòrtiku di 43 sekonde: vimeo.com/223784066

WEB
Banco di Caribe
Wendys
wendys banner

Comments

comments

Source link

Delegashonnan di Konsehonan Sosial Ekonómiko (SER-nan) di Kòrsou i Aruba di bishita na SER Ulanda,

Den kuadro di e ambishon pa sigui alsa nivel i kalidat di funshonamentu di e Konsehonan Sosial Ekonómiko (SER-nan) di paisnan di Reino den Karibe, un delegashon tékniko, konsistiendo di e direktornan/sekretarionan general di SER-nan di Kòrsou i Aruba, huntu ku algun di nan konseheronan, aktualmente ta di bishita di trabou na Hulanda i Luxemburgo.

Inisialmente, SER di Sint Maarten tambe lo a partisipá na e bishita di trabou. Sinembargo pa motibunan opvio (rekonstrukshon di e isla despues di orkan Irma i echo ku SER di Sint Maarten pa lunanan kaba no tin miembronan) nan no a haña responsabel pa djòin nan koleganan di Kòrsou i Aruba. Meta prinsipal di e bishita di trabou, ku a ser prepará konhuntamente dor di Kòrsou i Aruba, ta pa haña mas tantu informashon posibel riba último desaroyonan i trèntsnan riba tereno di tripartitismo, diálogo sosial, ekonomia di konsertashon i futuro di labor i pa tambe interkambiá di idea ku algun órganonan estatal relevante pa asina SER-nan di Kòrsou i Aruba por sigui profeshonalisá nan trabou, manera stipulá den lei, pa konsehá nan gobièrnu- i parlamentonan riba proyektonan di lei i áreanan di maneho ku un karakter sosial-ekonómiko. E delegashon a bishitá entre tantu e Fundashon Maatschappij en Onderneming (SMO) na Rotterdam ku ta un ‘think tank’ riba tereno di ekonomia sirkulario (circulaire economie). Aki nan a haña informashon amplio riba kiko ta ekonomia sirkulario, ku básikamente ta un koriente di pensamentu, un sistema ekonómiko / industrial nobo ku tin komo prinsipio básiko ku tur produkto i materia prima por ser resiklá i rebendé pa asina garantisá durabilidat/ sostenibilidat ekológiko, ofresiendo konsumidónan a la bes produktonan di kalidat superior. E konsepto aki riba nivel Europeo ta ganando mas i mas popularidat i diferente empresanan a kuminsá basa nan strategianan ekonómiko i komersial riba e konsepto aki. Tambe e delegashon a hasi bishitanan orientativo na Ofisina Sentral di Planifikashon (Centraal Planbureau), Ofisina di Planifikashon Sosial-Kultural (Sociaal-Cultureel Planbureau), Ofisina di Planifikashon Ambiental (Planbureau voor de Leefomgeving) i Konseho Sientífiko pa Maneho Gubernamental (Wetenschappelijke Raad voor het Regeringsbeleid) na Den Haag kaminda nan a ser informá ampliamente riba e nesesidat i importansia di akumulashon i interpretashon di data sientífiko komo rekisito básiko pa por yega na formulashon di maneho gubernamental (multi- anual) duradero i responsabel. E mensahe ku nan a risibí ta ku sin data i/o sifranan aktual i konfiabel, ta praktikamente imposibel formulá maneho gubernamental ku por sirbi i benefisiá komunidat. Den e kuadro aki a deliberá ampliamente riba e ròl krusial ku e órganonan aki, spesialmente Ofisina Sentral di
Planifikashon, tin durante di e proseso di formashon di gobièrnu, kaminda tur programa di
akshon i/o programa di kampaña elektoral di partidonan polítiko i tambe e akuerdo di
gobernashon ta ser kuantifiká i supstansiá ku sifranan real pa asina por determiná si nan ta
ehekutabel. Tambe tabata tin un enkuentro ku funshonarionan haltu di Ministerio di  Asuntunan Ekonómiko. Mas aleu e delegashon a sinta na mesa ku nan koleganan di SER di Hulanda kaminda nan a interkambiá di idea ku otro riba diferente área di interes komun i tambe a sondia e posibilidat pa den futuro serkano posiblemente yega na un tipo di kooperashon i interkambio institushonalisá riba nivel tékniko.

Komo ku Konseho Sosial Ekonómiko Hulandes tin profeshonalnan den servisio, spesialisá riba
áreanan spesífiko, kaminda netamente tin skarsedat na Kòrsou i Aruba, tin un base sólido pa e kontaktonan riba nivel tékniko redundá den palabrashonnan konkreto kon por hasi uso di e
ekspertisio aki. Den ámbito internashonal e delegádonan di SER-nan di Kòrsou i Aruba tambe a hasi un bishita di kortesia na Conseil Economique Et Social (e SER) di Luxemburgo, kaminda nan a topa ku e presidente, vise-presidente i sekretario-general di e konseho. E bishita aki a ser konsiderá komo unu ku un balor agregá grandi komo ku den e Asosiashon Internashonal di Konsehonan Sosial Ekonómiko i Sosial i Institutonan Similar (AICESIS), Luxemburgo ta ser konsiderá komo un “best practice” debí na e echo ku e la desaroyá, konhuntamente ku nan ofisina di estadístika, un método efektivo kon pa midi bienestar di su habitantenan, hasiendo uso di sierto indikadónan . E kontakto ku e konseho di Luxemburgo a ser establesé durante e último Asamblea General di AICESIS ku a tuma lugá luna pasá na e kapital di Repúblika Dominikana, Santo Domingo, kaminda SER di Kòrsou unánimemente a ser skohé komo sekretario general athunto di AICESIS pa e region di Latino Amérika i di Karibe. Durante e enkuentro ku SER di Luxemburgo tambe a papia riba último desaroyonan sosial i
ekonómiko riba nivel Europeo. Direktamente despues di su regreso for di Luxemburgo e delegashon a hasi un bishita di kortesia na minister plenipotensiario na Den Haag señor Anthony Begina. E próksimo dianan e delegashon lo kontinuá ku su gira na Hulanda, kaminda e lo bishitá Ministerio di Asuntunan Sosial i di Labor, munisipio di Amsterdam kaminda lo elaborá riba entre otro e tema di kombatimentu di pobresa, partisipashon den enseñansa i e link entre enseñansa i merkado laboral.

Comments

comments

Source link

INTERNATIONAL ENERGY AGENCY: EMSIHON DI CO2 PER CAPITA APSURDO NA KÒRSOU

E emishon di CO2 kousá pa kimamentu di kombustibel fósil ta bai kompaña di entre otro subida di nivel di laman i asidashon di oséano. Pa motibu di esaki isla chikí, asina yamá “small island development states (SIDS)”, lo wòrdu inunandá i ref di koral lo muri a la largu, miéntras ku hopi hende ta dependé di e refnan akí pa kuminda (piská) i entrada. No ta pa nada ku resientemente International Energy Agency (IEA) a publiká “Key World Energy Statistics“. Resultado di e investigashon akí ta ku Qatar ta tenedó di rekòrt ku 35,73 tonela CO2 per capita (= pa kada inhabitante) i e SIDS Kòrsou ta first runner up riba e lista hororoso akí: 30,43 tonelada CO2 per capita. Kousa: Tereno di Isla. Kua polítiko ta para ketu na esaki?

Comments

comments

Source link

InselAir MD bek den operashon ku buelonan komersial

Djarason 11 di october 2017, InselAir den kolaborashon ku outoridatnan di Aviashon Civil Korsou a kumpli ku tur e rekesitosnan di lei pa por a sertifiká e avion MD (MDI). E vuelo di aseptashon ku a wordu hasi tabata unu eksitoso.

Den e ultimo lunanan tras di lomba, InselAir tabata hasi su buelonan entre islanan ABC y Sint Maarten ku e avion Fokker 50, kual ta referí na e scenario “Basiko” ku a wordu introdusí na komienso di e reorganisahon di InselAir. Agregando e MD bek na e flota di InselAir ta un paso importante riba e kaminda pa e “Basiko Plus”, senario ku lo yuda fortalesé e situashon finansiero i lo kompletá e plan di stabilisashon di e kompanía. Den e senario aki klientenan lo mira ku rutanan anterior lo keda reanuda.

Pa e motibu aki ta trahando akuerdonan finansiero ku e paisnan den región. InselAir sigur lo sigui kontinuá ku su plan pa yega na e senario kaminda lo amplía su rutanan i konektividat den region. E MD ku su 145 stulnan lo opera tur dia riba e ruta entre Korsou i Sint Maarten entrante djahuebs 12 di Oktober, saliendo for di Korsou 9.15am i lo aterisa na Sint Maarten 10.45am. E buelo di regreso for di Sint Maarten lo sali 11:45am i lo aterisa na Korsou 1:15pm. InselAir ta gradisi e outoridatnan di Aviashon Civil Korsou i  tur empleadonan di InselAir ku a forma parti di e proceso extenso pa por a trese e MD bek den operashon i alabes ta entusiasmá di por kuminsa bek ku e servicio di jet pa nos klientenan riba e ruta di Sint Maarten.

Comments

comments

Source link